THE GREATEST LOVE............ :Marrte

'Mihringin a thian aia a nun a paih aliama hmangaihna nasa zawk tuman an nei lo. Thu ka pek apiang che u in tih chuan ka thiante in ni ang'. (Johana 15:13,14.) He changah hian Isua chuan a zirtirte chu a thupekte pawimawh zia hrilh hre turin tawngkam zaidam leh nelawm tak a hmang a. Anmahni a hmangaih zia leh an tana a thil tihsak zawng zawngte chu tehkhin thu hmangin a hriat nawn tir leh a ni. Midang hnena cheng za pe tur emaw, cheng sangkhat pe tur emaw, a ba zawng zawng tlak sak tur emaw chuan hmangaihna chak leh thiltithei tak a ngai ngei ang. Lal tana kutdawh rethei tak hnena a khawpui pek tawp mai emaw - a lalram leh a khua leh tui zawng zawng hlan vek mai pawh han ngaihtuah chhin la a mak hle ang le. Chu chu Khawvel chuan hmangaihna vanga thiltih mak danglam takah a ngai ngei ang. Mahse chu chu Isuan i tan a nun leh a taksa a hlan nen teh chuan engtihnamah a ni lo. Hei hi, he leia mihringin midang hnena hmangaihna a lantir theihna sangber chu a ni teh meuh mai. Tuemaw chuan a pawisa te, a thil neih te leh a nunna hmang ngei pawhin midang rawng chu a bawl thei alawm. Mahse tupawhin a sum leh a neih zawng zawng, a mite leh a ram te pawh midang tana thih ai chuan chan vek pawh a duh zawk ngei ang. Tuemaw chu midang tan a lo thi anih pawhin, Pathian in van atanga a Fapa a rawn tirh nena khaikhin chuan engtihnamah a la ni chuang lovang a. Pathian Fapa in kan ai awh a, hmelma leh thiam loh chang tawh kan ni chung pawh a kan tana lawm taka thisen chuaka a thihna nen teh chuan engtihnamah a ni lovang. He hmangaihna hi van leh khawvel leh thildang zawng ai pawha ropui leh sang zawk a ni.

Chumi chhanlet nan chuan Isua tan enge i tih ve tak ang? Kan thenawm tan kan nunna kha hlan mah ila, a nunna nen khaikhin chuan enge anih tehchiam le? Mahse Isua chuan chutiang khawp chu kan lak atangin a phut miah lova, rikrum thilah midang tan kan nunna kan thap a ngai te anih ngawt loh chuan. Isua chuan kan vengte lakah kan hmangaihna chu hmuh theih leh a tak ngeia lanchhuah tir turin min ti mai a ni.