Inpekna Kimah Lawm a Kim thin......: Marrte

Thahnemngaihnain a hrinchhuah lian tak pakhat chu inpekna a ni. Eng kawngah pawh eng thil pawh ti ila, thahnemngai hlein insawi mah ila, a taka kan hlen chhuah loh chuan dawt sawia ngaih kan ni tho vang. Kan insawi anga kan lanchhuah theih nan a taka chet chhuah ngei a ngai tih hre mah ila, inpekna tel lo chuan a lo thlen thui theih chuang meuh loh.

Miin, inpe taka a thawh chuan, a malsawmna dawnah pawh kan thil thei hauh lo vang. Eizawnna a ni emaw, Kohhran thil a ni emaw, khawtlang huapa chet chhuahnaah emaw pawh ni se, inpekna tel lo hma lakna chu lungawi lohna thlentu mai a ni. Inpe taka thawktu chungah lungawi lohna a thleng ve ngai lo. Lungawi lo, sawi nawi tur hre reng mai chi kan nih chuan kan thil tihah kan inpe tawk lo a lo ni thin.

A hla pawhin kan sak fo thin kha; ‘inpekna kimah lawm a kim thin’. Lawman aia vuina ngah zawk Rawngbawltu kan nih chuan kan inpekna a tlak hniam vang a lo ni thin. Rawngbawl hna engah pawh mai hian a thawk tam apiang an lawm thin. A thawk tlem tlem, Mahni thawh chhun hmu lian thin hote hi a ni lawman aia vui vaina tur char chhuak thin zawk chu.

Lawm lo chunga Lalpa rawngbawlna hian midangte a tihnual fo thin a. Mi dangte tan zangkhaina aiin phurrit a thlen zawk thin. He inpekna tel lo va rawngbawl thintu hi a ni, mi ten, ‘a nunah hmuh tur a awm lo,’ an tih fo thin chu. Peih lo hmelah hian eng a lang mawh khawp mai. Inpe taka Rawngbawltu chu miin fak hluam hluamkher lo mahse a rukin an ngaisang a,a thu sawi an awih thin.

Mi inpe chu an hmel leh hawiherah pawh hriat thin a ni. Mi inpe te avangin midangte an hahdam thin. Rawngbawltu inpe tak chu an tlu mai mai ngai lo. Theihtawp chhuah a chet la thin hote thu chuan ngaihpawimawh a hlawh a. Awihawm taka thu sawi tuma inbuatsaih vak ai chuan inpe taka kan chet chhuahna hian mi rilruah thu a sawi ring zawk fo a ni.

Lalpa rawngbawl hna hi inpekna tak tak nei lo va tlawmngaih chhuaha thawh mai mai chi a ni lo.