Pathian Hlate Hi

PATHIAN HLATE HI

“LALPA chu fak rawh u. Pathian chu a hmun thianghlimah chuan fak ula: A thiltihtheihna boruak zau takah khian amah chu fak rawh u. A thiltih ropui takte avângin amah chu fak ula: A ropui nasat êm avângin amah chu fak rawh u. Tawtawrâwt riin amah chu fak ula: Perhkhuang leh tingtangin amah chu fak rawh u. Khuangte leh lamin amah chu fak ula: Tingtang chi hrang hrang leh phenglawngin amah chu fak rawh u. Darbenthek ri thum miin amah chu fak ula: Darbenthek ri fiak miin amah chu fak rawh u. Engkim, thaw thei tawh phawt chuan LALPA chu fak rawh se. LALPA chu fak rawh u.” (Sam 150)

      Kristian 'inti' vek kan ni bawk a, Pathian hi engvanga faktur nge kan nih? Tih te chu kan hre theuh awm e, helam hi chu ka sawi tum ber pawh a ni lem lo. Mahse 'Engtia fak tur nge kan nih?' tihte leh 'Tuna Pathian kan fak danah hian Pathian a lungawi angem?' tih lampang ka thiam dang ang ang a rawn tar lan ve ka tum dawn a ni. Mahni a ngaihdan kan neihsa kha lo dah tha rih lawk ila, rilru inhawng tak leh tawngtaina nen chhiar lo tum la, I chhiar zawh a I lo ngaihdan hmasa nen khan enge dik zawk I khaikhin leh dawn nia.

     Bible chang ka rawn tar lan Sam 150 atang hian Pathian chu engvanga fak tur nge kan nih a, eng hmang in nge kan fak anga tuten nge Pathian chu fak tur? Tih kan hmu thiam theuh awm e. Mahse he Pathian thu kan sawi tak rin chhan a “Eng rimawi tumna (musical instrument) pawh hman a phal” kan tih a duh ang zawng zawng a kan han zai kual vel hi chu thil dik ber leh he chang hian a sawi tum ber anih chu a rinawm loh a ni. A instrument lampang erawh chu Pathian in amah fak nan chuan a phal zau hle tih a hriat theih bawk a ni. I Samuel 15 na a lal Saula anga mahni duh dan leh keimah nin emaw midangten tha an tih ang mai mai a Pathian fak tum hi kan va tam em! Mahni inthiam chawp chung a 'Ka tih that ve phawt chuan' ti a Pathian leh A thu thianghlim inziahna Bible kan rinchhan loh a tha kan tih ang zawng zawng a Pathian rawngbawl kan tum chuan kan chan tur chu 'Nangni thil sual tite u, ka hre ngai lo va che u, ka hnen ata kal bo rawh u...' tih bak hi chantur kan nei chuang lo.

     Pathian thu hi a huapzo a, napangte, pitar putarte, thalaite leh nu leh pate pawh thliar hrang lo in kan zavai tan hian a tha em em vek a ni. Chuvangin, zai hmanga Pathian thu kan hril dawn anih chuan Music huapzo tak hmang in A thu hi I puang darh ang u. A biktakin thalaite, kan music / hla duh thluk kalhmangte hi kum upa lam leh nu leh pate tan bengchheng mai ani thei a ni. Naupang lam leh thalaite ho tan ngei ngei pawh a zaiate thu lam pawh hriat hleih theih lo a music in hla a hneh (dominate) lutuk leh te/au vak vak hian a hla thute kha tha tak pawh ni mahse a hlutna a ti bo thei a ni. Kan Bible chang tarlan pawh khi ngun zawka ngaihtuah chuan, “Naupangte ho chuan kutbeng in, tar leh kum upa lamten khuang leh mihlim zai deuhin chuan thalaite chuan ri tang tha deuh et awt, vuak rik deuh pop pop in, in kum a zir zelin hetiang hian min fak dawn nia” a ti miah lo a, mi zawng zawng tan a sawi a, kan vai a mil tur hla kan thlang thiam tur tih na lam a kawk zawk mah a ni.

     Tin, tunlaiah, kan zaithiam tamtak ten Pathian hla hi ei zawn nan leh in tih lar nan a hman tum kan tam ta hle mai. Mipui pawn kan zir lo ve bawk a ni. Kan zaithiamte zai zawh a “I hla sak chu a tha khawp mai, ka rilru a hneh lutuk” tih ai in “Kha, in va zai tha ve, in thiam lutuk e!” kan tih zawk thin vangte pawh hian a ni pakhat ta ve ang, kan zaithiam tam tak ten zai that hi thupui ber ah an neih tak! Zaia Pathian rawngbawl tur chuan kan missonary-te ang tho in engkim chan huama rawng an bawl hi a ngai ve tho a ni. Isua damlai huna awm ve ang te kha lo ni ta ila, eihmuh nan chauh a zai te chu Isuan biakina thil zuartuho a um darh ang khan (Johana 2:14-16) a um darh ve vek mai lo'ng maw? Engmah hlawh nei dawn lo tih inhriatna hmunah pawh mahni sum seng in Pathianin talent min pek hmang hian A rawng kan bawl zawk dawn lawm ni?

     

      A tawpna tan chuan, thil reng reng hi a bul /alo chhuah na a fuh loh chuan engmah hi a tha famkim thei lo a ni. Thingkungte pawh a bul a hrisel loh chuan rah tha a chhuah thei lo. Chuvang chuan tha kan tihte hi Bible in tha a ti ve em tih hi I in zawt nawn fo ang u. Tin, sual ah hian te lua a awm lo a 'Unity is strength' tih ang kha 'sual' kan tih tan pawh hian a dik ve vek tih I hre ve bawk ang u.

     Lalpa'n chhiartute zawng zawng malsawm che u rawh se! Amen!