Ka inhlanna hi a nung em?..........Marrte

Khawngaihna kan neih chuan, mamawh tute tan thil engemaw kan ti thin. An mamawh te kan hmu a ni mai lova, kan rilruah kan hre reng thin. Kan chet a ngai a ni. Thil engemaw kan tih a ngai a ni. Bible hian khawngaihna tih tawngkam leh a kaihhnawih tawngkam te hi a hmang nasa hle a. Isua khan a mi tawn te kha a khawngaih thin hle a. Tanpui dan kawng a hre fo a ni. Keini pawh, Amah zuitute kan nih angin mahni kros pu a kan zui ve a ngai a ni. "Abrahama chuan maicham a siam a...a fapa Isaaka chu a phuar a, maicham chungah chuan a muttir a" (Genesis 22:9). Hei hi kan thil hriat sual, thi khawp hiala kan inhlanna chu Pathianin kan laka a phut san ber emaw kan tih thin, entirtu a ni a. Pathianin a duh zawka chu thihna kaltlanga kan inhlanna, Isua tih ang min tih tir theitu a ni a, chu chu kan nun hlan hi a ni."Lalpa, i hnenah chuan...thihnaah pawh kal ve ka huam asin." (Luka 22:33) tih lam ni lovin; "I thihna nen inzawm turin ka inpeih e, Pathian tan ka nun ka hlan theihna'n." tih lam zawk hi a ni a. Pathian hian thil chân turin min duh emaw kan ti thin. Pathian chuan he ngaihdan dik lo atang hian Abrahama chu a tithianghlim a, chutiang bawk chu kan rilruah a thawk mek a ni. Pathian chuan thil chân duh avang ringawta chân turin min duh lova, mahse thil tangkai atan erawh chuan chân huam turin min duh a, chu thil chu, Amah nena nun neih a ni. Chu chu kan nun phuar bettu hrui hrual phelh thawlna a ni a. Isua thihna kan hriat chian veleh chung hruihrualte chu phelhin a lo awm mai thin. Tichuan Pathian nen inzawmin a tan kan in hlan thei ta thin a ni. Pathian tana thi khawp hiala kan nunna hlan ringawt chu A tan awmzia a awm lova. Nung chunga inhlan turin - inthawina nung leh thianghlim leh Pathian lawmtlak ni turin kan taksa ngei inhlan turin min duh a (Rom 12:1). Hei ngei hi Pathian tana pawmtlak chu a ni.