PAKUATE KHA KHAWIAH NGE?.... Marrte

Isuan phar sawm a tihdam tum khan lawmthu sawi turin tihdam pakhat chu a va kir a. Lo lawmpuia lo thlamuan ta lo chuan Isuan, “Sawm lai kha in dam si a, khawiah nge pakuate kha?” tiin hrilhhai khawpin a lo zawt a. “Pakuate chunga mawhphurtu ka ni em ni?” tih ve mai a awl khawp ang. He thu atang hian enge kan zir tur chu ni ang le?

Kan Kohhran member hi Biak In ah hian a zatve hi kan inkhawm a ngem le? Kum tir atanga kum tawp thleng zakin kan member rawn inkhawm ngai lo te hi engzat tak awm ang mo? Chuti nise khawnge an awm a, enge an tih hlawm ang le? Pathian thu chuan, “Beram vengtute chu an mutthlu a ni” (Nahuma 3:18) a tih hi tun dinhmuna nang leh kei hi kan ni thei ang em? Heti chauh pawh a la ni lo cheu! “Beram vengtute chu an mawl a, an beram rualte an darh zo…” (Jer 10:21) zu la ti cheu va!

A em em deuh em? Ran rual zing atanga tla falte chu Chinghnia leh Sakeiten an seh thin angin, Pathian Kohhran pawn lama tlei takte hi chu Chinghne koham Diabola, khawvel zawng zawng bumtu chuan seh tumin a veh reng thin a. Heng mite ngaihsaka zawng khawm tur hian thupek khuah tak mai kan hmu a. Isuan, “Chhuak la, kawtthlerah te, kawmkarah te, lamlianah leh daiah te kal la, pachhia te, piangsual te, mitdel te leh kebaite han hruai rawh” (Lk 14:21-24) a ti. Kan Kohhran member hi ngaihtuah ta ila, Setana sakei ral hmaah engzat chaih nge awm le? “Anni pui turin I kal ang em, puitu an ngai em em, An boral zawh hma hian” tih hla angin nang leh kei hi vanin min nghak mek a ni. Khiah te, khuah te, sawtah te thlaraubo kan vei a , a tha reng… “I kiangah thimah mi an thi, thlanah thlamuanna nei lovin” tih hla kan sak hi engtin nge ni ta ang?

Camping te, Crusade leh program dang dangte kan hmang thin a, kan daih rei thei lo. Engvang nge? Van lawmna ber boralte zawnga chhandam an nih fo loh vang leh kawtthlerah leh daiah te, lamlianah leh kawmkarah te kala vakvai leh pachhia, van hmangaihte Lalpa Kohhran hruai luh an nih thin loh vang a ni thei ang em?. Vawiina pakua bo mekte tel lova hlim lo tum chhen hi a dik ber em? Kan Pathian thu chuan, “Sakeibaknei a rum a, tuin nge hlau lovang? Lalpa Pathian chuan thu a sawi a, tuin nge hril lo thei ang?” (Amosa 3:8) a ti a. Kan zinga thenkhat hi chuan kan hlau lo va, kan hril lo thei bawk niin a lang, a dik em? Pathian thu vekin, “…tupawh thil tha tih tur hriaa ti si lo chu a tan sual a ni” (Jak 4:17) a ti hmiah mai chu a nih hi! Thil tha tih tur i hria em? I ti ta em? I tih leh tih loh mawh chu i chungah a tla e.

“Pathian chuan thiltih zawng zawng chungah ro a la dawn si a, thil inthup engkim, a chhia emaw, a tha emawte pawh, tih hi” (Thuhriltu 12:14)

“Sawm lai kha in dam si a, khawiah nge pakua te kha?” tiin min zawt ta, enge tinge kan chhan dawn le.