NUN tak A duh A ni,............... Marrte

Chemtatrawta thawnthu hi Mizo thawnthuah chuan a lar berte zinga mi a ni awm e. He thawnthuah hian – mahni nihna anga lang ngam lo, mahni tihdiklovah pawh mawhphur ngam lo va, mi dang puhmawh tur zawng nun kan hmu a ni. Chemtatrawta thawnthua a changtute zawng zawng kha dinhmun inangah an ding theuh a ni. Dik tak chuan Khaum zamna rawpui fiktu kha Chemtatrawta a ni chiang a, mahse fik chhanah Kaikuang a puh daih si a ni.

Chemtatrawta kha ringtu tha tak, piangthar dik tak chu ni sela – “Chem ka tahlai khan ka chem tahna hmun leh ka thut dan, ka inthuam dan kha ka lo fimkhur lo lutuk a, Kaikuang tan thlemtu ka lo ni reng a, mau tam tak awm zinga Khaum zamna ber kher ka lo fik phawh kha ka thinchhiat lutuk leh ka en fimkhur loh vang a ni” tiin mahni inthiam lo takin sual a puang ang a, chu chuan Kaikuang pawh a chhandam ngei bawk a rinawm a ni.

Chemtatrawta ang ringtu tunlai hian kan tam ta hlein a lang. Kristian zingah mahni nihna anga lang ngam lo, Choak Arawn chang tawn anga mahni nihna aia lan mawi tum, mahni tihsual ngeiah pawh mi dang puhmawh ching, sual thup nun, lemchang kan tam em em tawh a ni. Lalpa chuan lemchang ni lovin Nun tak a duh a ni.

Ringtu chu nihnaah a ding nghet ngam tur a ni a, chumi avanga tuar a tul anih pawhin lungawi takin a tuar ngam tur a ni ang a; chan a tul pawhin a chan ngam tur a ni ang. Sawiselna karah beidawngin a titau mai tur a ni lo va; malsawmna dawn tur a awm pawhin chapopui kher lovin a dawng mai tur a ni ang.

Rorelna niah chuan mi tin kan thil tih ang zela rel sakin kan awm dawn a, lei tinrenga amahin a inpuang dawn. Kan in hriat dan leh kan in ngaih dan anga rel sak kan ni dawn lo. NUNNA – BUA zaik anga rel sak kan ni dawn a ni. Chumi huna – “Bawih tha leh rinawm i ti tha e” min han ti mai tur aia ropui thil dang a awm thei chuang dawn em ni?