Tun hi remchanna lei hun a ni ......... Marrte

Bible hian mihringte hi khawvela hun rei lo te hmanga thi leh tur kan ni tih min hrilh angin, nausen atangin tar thlengin, kan thi kan thi tih hretute kan ni. Kan thih hnuah, van ramah emaw hremhmunah emaw kan kal ngei tur thu Bible hian min hrilh a. Khawvel thiamna sang zel mahse, natna tihdam thei loh, thihpui ngei ngei chi a lo chhuak thar ve zela, inven ngaihna pawh a awm lo. Khawvel hmasawnna hian natna avang pawh ni lo va, “A hun lo a thihna” (Joba 22:16; Sam55:23 etc) a tih hi a rawn thlen tam em em bawk.

Natna vang ni kher lo pawh hian kan thi thut thut ta mai a, tuna nungdama la awm te pawh hi thihna nena inhmachhawn reng kan ni a, chutih lai chuan thihna chu engtikah nge ka chungah a lo thlen ve dawn tih ngaihtuah nachang hre lo hian hun hmang mek kan tam awm e. Dinhmun derthawng tak maia awm kan nih lai hian, tuna hun kan hman mek lah hi Bible chuan “Hun tha lo, Ni tha lo” a ti a. Chutiang huna awm kan nih tawh tih chu buhmang Setana hian kan hriat a hlau a.

Bumtu a nih angin bumna thlarau hmangin, ni hnuhnunga awm kan nihna te, thi thut thei kan nihna te hi kan hriat theih loh nan min bum a, tun hi remchanna lei hun pawimawh a ni pawh ka hre thei lo.

Bible- ah hian, lal te, roreltu te, mi ropuite, hausate leh mipuite, an hun tha hmang thiam lo va thi kan hmu tam hle a, heng zingah hian an hun thate Pathian duh zawnga hmanga thi pawh kan hre bawk. Mi rethei, beramvengtute khan, vantirhkoh thusawi an hriat avangin, an hun tha remchang hmasaah Isua hmu tur leh chibai buk turin an kal a. Nausen Isua an hmu a, an hlim hle tih Pathian thu atangin kan hre thei a ni. Isua bula kraws-a an khenbeh, rapthlak taka thi a, hmun rapthlak hrehmun pan ngei tur pawh khan a hun tha tlemte a neih kha hmang thiamin Isuan, “Vawiinah ka hnenah Paradis-ah i awm ve ang” a ti a nih kha.

Kan Patihan thu in min hrilh, ni hnuhnunga thil lo thleng turte an lo thleng zut zut reng a. Khawvel pawh Nova te Lota te hun lai ang maiin Pathian pawisak lohna a nasa sawt hle. Lal Isua lo kal lehna pawh a hnai tial tial a, hei vang hian, tunah chuan ni tha lo, hun tha lo ah kan awm a. Kohhran rawngbawltu leh member hote zingah pawh, Petera’n, “Sakhaw ngaihsak nia inngai” a tithe hi kan pung sawt hle a nih hi. “Chutichuan, mi fing lo te anga awm lovin, mi fingte anga awm zawkin, in awm danah fimkhur rawh u. Nite hi a that loh avangin remchanna te lei zel rawh u” tiin Pathian thu in min hrilh.

“Ni tiamte a hnai ta, a lo kal dawn e,

Nite a kiam, hun a tawi ta;…”