NUN KRISTA ......................... Marrte

“Kei atan zawng nun hi Krista a ni si a, thih pawh Hlawkna a ni” (Phil 1:21). Chhandamna chungchanga chiang inti, nun chhuahpui lama fiah leh si lo mi tam tak awmna chhuan thar hunah kan khawsa mek a. Sawifiah lamah chuan kan sang khawp. Mahse nun fiah lamah hian kan hnufual ta em a ni.Mi mita hmawlhte awm hmu thei hle si, mahni mita rawhung awm reng pawh hmu thei si lo te; tawp tak chunga duhtui leh viau si. Hetiang ho nun ram hi hriatthiam a har thin. Duh reng pawh duh si lo, duh loh reng pawh duh si ang hi an ni ber mai. Engpawhnise, nun chiang leh fiah tak, hriatthiam theihnun chhuahpuitu hi kan mamawh chu a ni. Chu rilru atang chuan kan thupui hriat lar tak hi I lo en chiang deuh teh ang.

Thianghlim tak leh rinawm takin Josefa khan inngaihna kawr ruam a zawh chhuak a, a tih Pathian chuan chawimawi ve awm ta a nia, chuti a hnehin hrehawm tinrenga tuarin tan in rip chhungah khung a ni ta si. Mahse chumi avang chuan a nun a chauh phah lo va, a Pathian tih nun chu a fiahtawlh tawlh zawk a ni. Pathian rorel chu engmahin dang zo hek lo le. Tan in rip chhung atangin

Pharoa lalthuthleng tawmpuitu ni turin lakchhuah a lo ni ta! Rorelna thuthleng a luah mek lai pawhin Josefa nun khaa chiang fiah hle. Pathian duhdan chu amahah khan tihpuitlin zelin a awm si a.

Kan chang thlan thu au chhuahpuitu Paula nun hi a fiah chiang hle, a tana Hlawkna tur zawng zawng pawh Krista avangin engmah lova ngaia hnawl ngam, hmuh theih en lova hmuh theih loh hmu thin; Kristaah a nung a, amahah Krista chu a nung bawk a ni. Chuvangin “Thih pawhin Lalpa tan , Nun pawhin Lalpa tan” tih hi nun Krista khaikhawmna hnukpui chu a ni. Chutah chuan Krista rilru tawmpuina takzet chu a awm a, chu hmun atang ngei chuan hringnun hun chunga Lal remruat lo thleng zawng zawngah hian buai lova damchhung ni chhiar thiamna chu a lo awm reng si a.

He nun ram atang hian engkima lungawi zel theihna te, engkim hriatfiah theihna te, engmah neih lohna atanga engkim neitu nihna te, Lalpaa lawm fona te, chak lohna ata chakna te, nitin chhunglam nun siam thar zelna te chu a awm a, “Kei atan zawng nun hi Krista a ni si” tih thu hi tih mai mai a la ni lo va, thu namen lo tak a ni. He thu ropui tak hian heng thuchah hi a keng tel a- kan ropuina tura inngaitlawma mite duh loh leh hmusit Isua chu a lo ropui theih nan amah an hmusitna phurh ve te, Krista avanga a channa leh tawrhna, lungngaihna leh tahna ruam zawh ve te, retheihna kawr ruam atanga Lalpa hausak ren rual loh tawmpuina te, engkima lungawina leh lawmna nun tuihna kangchat ngai lo te, khumkhua pawha danglam lo tur rintlak Isua tan thih thlenga rinawm ve tura inpekna te hi lo thleng zel rawh se.