Vengte Hmangaihna

VENGTE HMANGAIHNA

“Tin, an zinga mi pakhat, dan hretuin, “Zirtirtu, Dan thuah chuan eng thupek hi nge ropui ber?” tiin amah fiah nan thu a zawt a. Tin, ani chuan a hnenah, “Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,’ tih hi. Chu chu thu pek ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vengte pawh i hmangaih tur a ni,’ tih hi. Chung thupek pahnihah chuan dan thu leh zawlneite thu zawng zawng a inkhaikhawm vek a ni,” a ti a.” (Mat 22:35-40).

Hetah hian ka rawn sawi tum zawk a chu “a dawttu, a anpui” a tih hi ni. Ka chang rawn tarlan atang hian Pathian in kan thenawm khaw vengte hmangaih tur hian min duh em em ani tih ka hre thei a, dan thu leh zawlneite thu zawng zawng khaikhawm vektu ni hial in Isuan a sawi a ni. Engatinge kan Pathian hian hetiang em em a pawimawh leh ropuiah hian a dah? Tih kan ngaihtuah ngai em? A chhan ni thei awm chu mahni thenawm khawvengte hi Bible in hmangiahna a sawi anga hmangaih tur chuan mihring tan chuan a har em vang ni in a lang. Samari mitha tehkhin thu kha kan hre vek anga, hetah hian zirtur tlemte chauh awm mahse pawimawh tak leh Isua meuh pawh in 'dan zawng zawng inkhaikhawm na' a tih 'Hmangaihna dik' kan lan chhuah tir dan tur min hrilh a ni. Suamhmangtawk-a kha kawnglaiah tanpui ngai tak leh ngaihventu pawh nei lo in a let reng mai a, a hmu apiang in an hel zel a. A tawpah Samiri mi, pakhat alo kal a, ani chuan a pem ah te hriak te uain te a hnawih sak a atuam that sak a nih kha. Chumi hnuah ama sa chungah a chuan tir leh a, khualbukah a kalpui a, a enkawl chhunzawm leh zel a ni. Helai thleng hi chu kan la ti ve thei theuh mai, mahse hemi zawh lama Samari mi, 'Mi Tha' a nih bik na kha a rawn lang ta chiah a ni. Engtin nge a in ziah zel kha? Khualbuk vengtu hnenah khan pawisa a pe a 'Lo enkawl la, he mi baka i sen zawng chu ka lo kir leh hunah ka rawn rul leh ang che,’ ti in a kalsan anih kha. A hmaa a lo sen tawh kha chu a sawi lang lo reng reng tah hian, chumi piah lamah chuan damlo enkawl na tur kha khualbuk vengtupa kha a pe thlap anih kha. Chumai chu ala ni lo cheu! 'He mi baka I sen zawng chu ka lo kir leh hunah ka rawn rul leh ang che,' ala ti thei a ni. Hetiang baka vengte chunga hmangaihna dik lantir dan hi a awm leh thei tawh chuang dawn em ni? Tunlai keini Kristian “IN TI” ho zing ah hian 'Kan thenawm khawvengte ka hmangaih e' kan tihdan nen hi chuan a van in ang lo em!

Damlo leh khawhar lusun chhungkuate chu kan in lenpui in kan han in thlawhchhuak ve thin a, that chu a tha khawp mai, tih reng fo tur pawh a ni. Mahse ruihhlo ngai ho te, ruk hmangte leh mihring in misual kan tih ang zawng zawngte hi kan hmuh hmaih thin ni in ka hria. An ni hian damlo leh lusun chhungkuate ang bawk khan kan tanpuina an mamawh a sin! Mahse a har thin a ni mihring chakna ringawt chuan. Tum khat chu keipawh kan kawmthlangah hian chhunpachhan lai tak mai hian mipakhat zurui hi kawngsir ah hian a rawn mu tawp mai a. Kan in tukverh atang chuan ka en reng a, ka rilru chuan 'Khutia kawnglaia a mut tawp ai chuan zuk pawm chho ila kan thutthleng velah te mut tir hrih mai ila atha angem aw?' ka ti a. Chutih laitak tho chuan ka rilru pakhat in 'Zu rui mai mai zuk buaipui te chu, bakah zuk pawm tho dawn ila, min lo hai anga a rui khan mi te kha kutthlak te alo tum anga, tul lo ah ka zuk in ti buai vak mai lawng maw?' tih ngaihdan kha a rawn lut ve nghal bawk a. Chutia rilru insual chunga ka en reng lai chuan 'Zuk pui lo mai ang' tih ngaihdan khan min hneh zawk aniang chu, amah hmuh theih loh na lai ah ka kalsawn ta daih a. A hnuah chuan an inchungpa a rawn kal a, an in lamah, kan in ai pawh a hla zawk ah, a pawm thla ta a. A tuk leh alo thlen chuan a hma ni a ka thil lo tawnah khan ka harhchhuak ve leh ta chauh nih chu! Tikhan zurui pa kha ka hmuh tirh khan kan inah lo hruai chho ta vat ila chu mi kawng kal tamtak in an hmuh na tur lakah khan ka lo veng dawn tihna kha nia, a mualphona lakah ka lo hum anga ka hriat miah loh in zuruipa tan kha chuan malsawna thlentu ka lo ni thei reng a ni tih ka hrechhuak ve ta chauh a.

Kan entawn tur Isua kha chuan min hmangaihtute chauh kan hmangaih let hian misual kan tihte ai hian kan danglam bik chuang lo tih min zirtir anih kha. (Luka 6:32-36). Kan hmangaihna hian tumah thlei bik a nei tur a ni lo. Tin, ka chang rawn tarlan ah phei hi chuan mi thil kan puktir in a let leh kan besei kher tur a ni tlat lo. Mi lian emawn mirethei, mifel emaw misual, an vai hian hmangaihna khat in kan en tur a ni, kan Pathian ngei pawh duhsak bik nei lo Pathian a nih avang in. (Deu 10:17). Mihring chakna ringawt chuan thil theihloh top a ni. Mahse ringtute chuan kawng engkimah kan rin Pathian hi kan entawn tur a ni si a (I Peter 2:21). Chuvang chuan nitin tawngtaina nen a hniakhnung kan zui theih nan chakna kan dil thin tur a ni reng a ni.

Kan vengte kan hmangaihna tur a min dal tu lian deuh pakhat chu in sawisel/in rel na hi a ni. Mi an that loh na leh an dik loh na an hmaichhana kan hrilh hian kan sawisel in kan rel tihna a ni lo. An dik lohna ah te chuan that lam an lo pan theih nan hmangaihna nen kan zilh tih na a ni zawk. 'Tawngtai sak ila an tha ve leh mai ang' ti a kan reh san ai chaun zilh chu kan tihtur reng pawh a ni. 'Tawngtaisak kha a tha lo e' tihna ni lo in. Thufingte 27:5 ah pawh 'Hmangaihna inthup ai chuan alanga zilhhauna a tha zawk' alo tih kha. Anih loh a, midangte hnenah an that lohna kan sawi chiam hian kan sawisel in kan rel tih na a ni. Kan thenawmte that loh na midang kan hrilh daih hian engmah sawt na a nei lo. Achang phei chuan thilsual ti an ni tih kha an in hre lo reng reng ang, an mahni kan hrilh miau si lo a, enge insiam that an ngaihna lai pawh an hre thin lo a ni. Huaisen tak in, an hmaichhanah ngei 'In thil tihdan hi a dik lo e, hetiang zawk tur hian a nia' emaw 'In tuichhia luan na hi a fel chiah lo a midang tan a rim chhia a' tih ten an dik loh na laite kha tawngkam mei nei tak ni lo in kan hrilh ngam tur a ni. Hetia kan tih hian hmangaihna dik chu kan thenawm khawvengte chhungah kan lantir tihna a ni.

Tin, a tawp ber atan chuan I in tawngtai sak thin ang u. Mi an dik loh na te hmangaih taka kan hrilh hnu pawha an la awih theih lo anih chuan I beidawng mai lo ang u. An tan bang lo an sual te leh an dik lohna te an sim theih nan I tawngtai sak thin ang u. Kar khat emaw thla khat emaw kum khat emaw kan lo tawngtai pui tawh thin pawh a ni thei e, an la insiam that theih loh chuan kan la tawngtai sak nasa tawk lo mai bakah keimahnin chetzia in kan zirtir lo a ni tih I pawm ngam ang u. Kristiante chuan 'Isua in Pa hmaah kan sualte ngaidam tur in min dil sak reng a' kan ti thin ni lawm ni? Kan rin Isua rilru ang hi put I tum ve hram hram ang u.

Lalpa'n chhiartute zawng zawng malsawm che u rawh se! Amen!

Note: Ka thu ziak hi ka thil tih thin reng reng ziak ka ni lo a, keimah pawh in ka mamawh em em, engtik lai pawha keimah ngei min zirtirtu tur leh ka in enfiah na tur atan a ziak ka ni.