ENGNGE KA TIH TUR ...................., Marrte

“Chutichuan keini mi chakte hian mi chak lote chak lohnate chu kan tuarpui zawk tur a ni. Mahni vengte tihsawt nan an thatna turin tihlawm I tum theuh ang u; Krista pawh khan mahni lawmna a zawng si lo.” Rom 15:1-3

Mihring taksa pianphungah mi pian tha, hrisel leh chak deuh te an awma, pian to fel lo sa leh hrisel lo tak leh thahrui leh ngaihtuahna thlenga mi chak lo deuh an awm thei ang bawkin thlarau lam nunah pawh mi inpe zo leh chak deuh an awm a, inpe chak thei lo leh chak lo deuh an awm thin. Hetiang mi chi hnih hi kan nunho theih nan tih tur pawimawh tak tak a awm.

Mi chak lo zawk leh thiltihtheihna nei tlem zawk Ringtute zingah an tam em em. Hetiang mi hi an chak lohna leh tlin tawk lohna kan dema kan hau mai chuan kan titlu mai thei thin. Chu ai chuan a tih theih tawk lawmpuia, a chak lohna lai taka tanpui a thain a sawt ber a ni.

Naupang chu thu a awih theih nan kan fuih a, kan

tilawm phawt thin angin puitling pawh hi kan thatna lai kan inchawimawi thiama, kan infuih thiam chuan chu chuan mihring hi a tilawm a, a tisawtin a tichak thin. Kan thlarau nunah pawh chutiang tho chu a ni.

Mahni hmasialna nun chuan mi dang rilru a tina a, mi dang lawmzawng a zawn theih loh. Mahni hma sial lo, mi dang tana inpe tluan chhuak Lal Isua nun chu zirin, mite lawmzawng kan zawn a pawimawh. Mahni tan ngeia kan duh hi mi dang tan pawh a tulin a pawimawh em em a ni.

Mihring kan nihhonaah te, ram khat leh hnam khat kan nihhonaah te, chhungkua kan awmhonaah te, lungrual tak leh inngeih tlang taka khawsaho thei tur chuan a pawimawh ber chu hmangaihna a ni. Hmangaihna chuan sual tinrenga lakah ringtu a vawng him thin a. Miin hmangaihna hi a rilru leh thinlung taka a neih tlat chuan a nun pumpui a thunun thin a, ringtu tana dan zawm tur tak chu a zawntir nghal thin a, ringtu nunhonaah a pawimawh ber a tling hial a ni.

Hmangaihtu dik tak awka chu ran pawhin an hre thin angin mi a pawhin a hre thiam thin. Hmangaihna chuan mite chu tha se a duh a, hmangaihna awka tak tak nena zilhna chu tuman an ngai haw ngai lo. Haw thin mah se hmangaihna vek chuan a hneh a, a siam tha thin.

Hmangaihna chuan mi dang chungah chhiatna a thlen duh loh avangin tu tan mah harsatna a siam ngai lo. Siam ahnekin mite a tanpui zawk thin. Chuvangin hmangaihnain mi tumah a tibuai ngai lo va, harsatna a siam ngai lo a ni.

Inhmangaih tawnna chuan ringtute nunhona hi a tifamkim a, a tinuam a, a timawi thin a ni.