EVANGELISM ........: - Marrte

Isua anga chhiahhlawh-hruaitu te hian tu rawng nge an bawl tih hi an hriat reng a ngai. Chhiahhlawh-hruaitu chungchangah hian hruaitu chuan tu rawng nge a bawl tihah hriatchian loh engemaw a awm thin a. Thlarau lama hruaitute chu an mite chhiahhlawh ni lovin Pathian chhiahhlawh an ni zawk. Hruaitu ni chunga chhiahhlawh nih chungchang sawihonaah hian Isuan a zirtirte ke a sil sak kha sawi lan a ni fo a, a âwm rêng bawk a. Mahse Bible chuan Isuan hetiang thil a tih thu hi vawikhat chauh a tarlang a. Isua kha a zirtirte chhiahhlawh ni se chuan an ke kha zantin a sil sak thin ang a, Petera'n a ke chu sil sak ve lo tura a ngen pawh khân a remti ngei ang. Mahse Isua chuan amah zuitute chu an duhzawng tihpuitlinsak a tum lova; a pain a phut ang chu pek a tum zawk. Chuvangchuan Petera pawh kha,"Ka sil loh che chuan ka hnenah engmah chan i nei lovang" (Johana 13:8) tiin Isua khan a chhang a ni. Zirtirte kha Isua rawngbawlnaa a tihturte tuksaktu an ni lova. A tuksaktu chu Pa zawk a ni a. Isua chu an chhiahhlawh ni lovin Pa chhiahhlawh a ni zawk. Isua khan a zirtirte ke kha sil sak mahse an rilruah ani chu an Lalpa a la nih leh nih loh thuah eng zawhna mah a pian phah chuang lo a ni.

Khami zan khan sawm leh pahnihte kha Isuan an rawng a bawlsak nachhan chu Pa in ti tura a duh vang a ni a. A zirtirte tan erawh an Zirtirtu leh an Lalpa a ni tih a inhre reng thin (Johana 13:13).  Isuan khan A zirtirte kha rawng a bawlsak a ni mai lova, a zirtir nghal a. A lalram ziarang a entir a ni. Thlarau lama hruiatute pawh hian an mite rawng an bawl tur a ni a. Mahse chu an rawngbawlna chu Thlarau Thianghlim kaihhruai leh chawh phur a ni tur a ni. Hruaitute chuan an puanven sawichhinga an mite rawngbawl sak an hreh loh chuan khawtlang inpumkhat, midangte tana thiltih hreh lo awm khawmna an siam thei dawn a. Mitinin hreh miah lova midang rawng an bawl sak theuh chuan  mimalin a tih theih aia nasa tak, a huhova ti thei tura inpumkhatna an chherchhuak thei a ni.  Chhiahhlawh nun chuan inhmelmakna a tibo thin a. Isua zirtirte pawh khan Lalpa chhiahhlawh an ni tih an inhriat a ngai a, chuvangchuan rawng inbawl tawn sak tura koh an ni bawk a. Zirtirten chu chu a hriat hnu chuan an khawvel chu thlak danglam hlawk turin an inpeih ta a ni.