Mana lei kan ni ............................ Marrte

“Mana lei in in tawh; mihringte bawihah lut suh u.” 1 Korinth 7:23

Isua Krista thisena lei, Krista tana tlan kan nih avangin mihring bawihah kan luh awih a ni lo, Setana bawih kan nih a thiang hek lo. Kan nunah hian mihringin emaw, Setanan emaw ro an rel a thiang tawh lo. Hei hi hre tawl lovin ro kan reltir leh mai thin a, Pathian rilru kan tina thin a ni.

Mana lei kan ni tih awmzia chu tlanchhuah kan ni tihna a ni a. Awmze thuah hnih a nei. Kan tanna hmun, Setana min hren behna hmun kan chhuahsan ta tihna a ni phawt a. A dawtah chuan Pathian hnen kan thleng ta tihna a ni a. khawi ata nge min tlan chhuah? Sam phuahtu chuam “dotu kut ata” tiin a sawi. “Lalpa mi tlante chuan chutiang chu sawi rawh se, Dotu kut ata a tlan,” (Sam 107:2)

Tita 2:3 chuan “bawhchhiatna zawng zawng lak ata min tlan,” tih a sawi a. Galatia 3:13 chuan, “dan anchhe lak ata min tlanchhuak ta,” tih kan hmu. Hosea 13:14 ah chuan, “ Seol leh thihna kut ata tlan,” kan nih thu a lang leh. Heng atangte hian man pea min leia, min tlanchhuahna chhante, a awmziate hi ngaihtuah ila a tha ang.

Min Tlantu chuan kan thlarau a tlan a, kan rilru leh kan taksa a tlan a, kan pumin min tlan a ni. Kan duhzawngte pawh a ta ni turin a tlan vek a ni.

Kan nun hi a pumin Krista chuan a lei a, a tlan chhuak a, a ta a ni tawh. Kan kut te, kan ke te, kan mit leh kan beng te, kan lei te nen a ta a ni vek tawh a. kan kuta kan thawh tur leh kan khawih turte a thunun vek tur a ni. Kea kan kalna turah pawh thu a nei tawh ang. Benga kan ngaihthlak tur pawh phal leh phal loh a nei. Engnge kan ngaihthlak ang? Khawvel thil ngaihnawm, min hruai sual theite ngaithla lovin, Lal Isua leh a hmangaihna thu kan ngaithla ang. Kan mita kan en tur leh kan hmuh tur pawh a thunun tur a ni ta. Khawvelah hian hmuh chakawm a tam mai. Chung hmuhnawmte chu ni lovin, Kristan Krawsa min tuarsak lai leh a tho leh hmel chu kan hmuh chak ber tur a ni.

Kan lei hian engnge kan sawi ang? Mi rel nan phal tawh lovin. Intihbuai leh innghirnghona thu te, thu bawlhhlawhte sawi nana kan hman thin kha eng atan nge a tlan? Lalpa fakna thute sawi nan leh a Chawimawina hlate sak nan a tlan a ni.

Kan rilru leh kan thinlung te, kan duhzawngte chu tihdanglam leh tihthianghlim atana lei a ni a. Chuvangin kan ngaihtuah te, kan hlimna te, kan thiltum te, kan ngaihhlut te, kan huatzawngte pawh aman a tidanglam thei. Pathianin ama ropuizia leh a hmangaihna tilang turin kan nun hi a hmang duh a ni. Min neitu hmaa Setanan a englai mah hi a hman a thiang tawh tur a ni lo. I taksa kha Thlarau thianghlim In ni tura tlan a ni. Tihbawlhhlawh a thiang tawh lo a ni.

Chhandamtu ka rilru no hi,

I hnenah pek ka duh e..